Prepare pou
Bay Tete
Bagay ki pi enpòtan ou ka fè pou prepare w pou bay tete se kwè ou kapab fè li!
Planifikasyon pou vwayaj bay tete w la ka gen ladan l fikse objektif a kout e a lon tèm.
Men lòt bagay ou ka fè:
- Pale ak pwofesyonèl swen sante w lan.
- Di yo plan ou genyen pou bay tete.
- Si w gen depresyon oswa w ap pran sipleman oswa medikaman, pale avèk yo sou tretman ki ka mache ak bay tete.
- Mande si kote w gen plan pou akouche tibebe w la gen anplwaye pou sipòte w.
- Pale ak WIC.
- Mande klinik WIC lokal ou a pou sipò sou bay tete. WIC gen konsiltan laktasyon ak Konseye ki ka ede w fikse objektif ou yo sou bay tete anvan w akouche tibebe w la.
- Pale ak lòt moun ki te deja bay tete.
- Pa kite yon eksperyans negatif chanje objektif ou yo, poze plis kesyon epi aprann a pati de li.
- Antre nan yon gwoup sipò pou bay tete.
- Pale ak zanmi oswa fanmi ki te deja bay tete.
- Prepare w lakay ou.
- Prepare yon espas ki konfòtab, kote ou ka detann ou lakay ou pou bay tete.
- Kenbe founiti pou konsève lèt la pare si w pral tire lèt.
Yon fwa tibebe w la rive, men kèk bagay debaz pou w sonje.
Bay tete souvan
Lè tibebe w la fèt, li pare pou l resevwa karès epi manje. Pratike kontak po-ak-po nan lopital la ak lakay ou. L ap grangou nan kèk èdtan apre nesans li.
- Vant tibebe w la piti anpil, men l ap grandi vit. Se poutèt sa l ap manje 8-12 fwa pa jou, pafwa plis.
- Bay tibebe w la manje lè l grangou. Pa ba l manje sou yon orè. Ou pwal aprann sinyal "Mwen grangou" tibebe w la.
- Kite tibebe w la manje kantite tan li vle. Ou pral aprann sinyal "Vant mwen plen" tibebe w la.
Mete w alèz
Bay tete mande pratik. Plis ou alèz, se plis l ap fasil. Chèche sa ki pi bon pou ou menm ak tibebe w la.
Pou Manman
- Chèche yon espas pou detann ou.
- Chita oswa kouche nan yon pozisyon konfòtab.
- Pran dlo ak yon ti goute – ou pwal bezwen yo!
Pou Tibebe
- Kenbe tibebe w la nan yon pozisyon ki konfòtab pou nou toulede.
- Pa sipòte dèyè tèt li, men dèyè kou li.
- Kenbe men tibebe w la lib. Yo santi yo an sekirite lè yo ka manyen w.
Konsèy
Tibebe w la ka pa vle yo kenbe l menm jan chak fwa y ap nouri. Eseye plizyè fason pou kenbe l jiskaske ou jwenn youn ki konfòtab pou tibebe w la.
Konsèy
Tibebe w la ka pa vle yo kenbe l menm jan chak fwa y ap nouri. Eseye plizyè fason pou kenbe l jiskaske ou jwenn youn ki konfòtab pou tibebe w la.
Pran swen tèt ou
Koute kò w lè w santi w strese. Pran swen tèt ou epi montre w janti ak tèt ou. Jwenn fason pou diminye estrès w ap santi a.
Antoure tèt ou ak moun ki sipòte w
Leve yon timoun se anpil travay! Kite fanmi ak zanmi ede w ak travay nan kay la oswa kenbe tibebe w la pandan w ap dòmi, repoze, oswa benyen. Gen anpil chans yo vle ede w, epi ou merite yon ti repo! Menm jan an tou, bay tèt ou yon espas lwen moun ki di oswa fè bagay negatif ki fè w santi w strese.
Rilaks
Jwenn yon kote ki trankil, konfòtab, epi rilaks pou w bay tete. Santi w rilaks lè w ap bay tete pi agreyab pou ou menm ak tibebe w la. Sèvi ak tan sa a pou kreye yon lyen ak tibebe w la, koute mizik poze, medite, oswa fè lekti. Bay tete ka ede w rilaks epi jere estrès pi byen. Kontak po ak po ak tibebe w la gen yon efè kalman natirèl.
Dòmi
Li enpòtan pou ou repoze ase pou ou santi ou fre. Dòmi ede ou santi ou pi byen epi rete fò. Li ba ou enèji tou pou pran swen tibebe w la epi li kenbe sistèm iminitè w la ap fonksyone byen. Anplis, dòmi ase ede atitid ou epi li fè li pi fasil pou jere defi yo lè w se yon nouvo manman.
Fè mouvman
Aktivite fizik amelyore atitid ou. Lè w ap fè egzèsis, kò w pwodui kèk òmòn ki ka ede soulaje strès. Eseye fè yon ti mache nan blòk la epi mande pwofesyonèl swen sante w la kilè ou ka rekòmanse fè egzèsis difisil apre akouchman.
Jwenn èd nan men yon pwofesyonèl
Yon terapis ka ede w travay sou strès epi jwenn fason pozitif pou jere pwoblèm yo. Kontakte WIC pou ede w jwenn sipò ou bezwen an.
